🔥ਪਿੰਡਾਂ ਵਿੱਚ ਗ੍ਰਾਮ ਸਭਾ ਅਜਲਾਸ ਨੂੰ ਮਜਾਕ ਸਮਝਦੇ ਨੇ ਕਈ ਪਿੰਡਾਂ ਦੇ ਸਰਪੰਚ : ਕਸ਼ਮੀਰ ਸਿੰਘ ਘੁੱਗਸ਼ੋਰ
🔥ਪੇਂਡੂ ਮਜ਼ਦੂਰ ਯੂਨੀਅਨ ਵਲੋਂ ਕਰਤਾਰਪੁਰ ਵਿੱਚ ਹਾਇਵੇ ਕੀਤਾ ਜਾਮ
🔥ਪ੍ਰਸ਼ਾਸਨ ਵਲੋ ਪਾੜਾ ਪਿੰਡ, ਕੁੱਦੋਵਾਲ, ਦਿਆਲਪੁਰ ਦੇ ਸਰਪੰਚ ਖਿਲਾਫ਼ ਕਾਰਵਾਈ ਦਾ ਭਰੋਸਾ

ਕਰਤਾਰਪੁਰ (ਹਿਤੇਸ਼ ਸੂਰੀ) : ਤੈਅਸ਼ੁਦਾ ਗ੍ਰਾਮ ਸਭਾ ਇਜਲਾਸ ਵਿੱਚ ਨੇੜਲੇ ਪਿੰਡ ਦਿਆਲਪੁਰ, ਕੁੱਦੋਵਾਲ ਦੇ ਸਰਪੰਚ, ਪੰਚਾਇਤ ਮੈਂਬਰਾਂ ਵਲੋਂ ਹਾਜ਼ਰ ਨਾ ਆਉਣ ਅਤੇ ਪਾੜਾ ਪਿੰਡ ਦੇ ਸਰਪੰਚ ਵਲੋ ਇਜਲਾਸ ਦੀ ਚਲਦੀ ਕਾਰਵਾਈ ਦੌਰਾਨ ਕਾਰਵਾਈ ਰਜਿਸਟਰ ਨਾਲ ਲੈ ਜਾਣ ਵਿਰੁੱਧ ਪੇਂਡੂ ਮਜ਼ਦੂਰ ਯੂਨੀਅਨ ਪੰਜਾਬ ਦੀ ਅਗਵਾਈ ਹੇਠ ਉਕਤ ਪਿੰਡਾਂ ਦੇ ਸਰਪੰਚਾਂ ਅਤੇ ਪੰਚਾਇਤ ਵਿਭਾਗ ਦੇ ਅਧਿਕਾਰੀਆ ਖਿਲਾਫ਼ ਕਾਰਵਾਈ ਕਰਨ ਅਤੇ ਪਿੰਡ ਪਾੜਾ ਪਿੰਡ, ਦਿਆਲਪੁਰ ਤੇ ਕੁੱਦੋਵਾਲ ਵਿਖੇ ਸਰਪੰਚਾਂ ਦੀ ਹਾਜ਼ਰੀ ਤੋਂ ਬਿਨ੍ਹਾਂ ਉਕਤ ਪਿੰਡਾ ਵਿੱਚ ਗ੍ਰਾਮ ਸਭਾ ਦੇ ਹੋਏ ਅਜਲਾਸ ਵਿੱਚ ਰਿਹਾਇਸ਼ੀ ਪਲਾਟ ਦੇਣ ਦੇ ਪਾਸ ਕੀਤੇ ਮਤਿਆ ਨੂੰ ਮਾਨਤਾ ਦਿਵਾਉਣ ਲਈ ਕਰਤਾਰਪੁਰ ਵਿਖੇ ਨੈਸ਼ਨਲ ਹਾਈਵੇ ਜਾਮ ਕਰਨ ਲਈ ਜੰਗ-ਏ-ਆਜਾਦੀ ਯਾਦਗਾਰ ਨਜ਼ਦੀਕ ਡੀਐੱਸਪੀ ਕਰਤਾਰਪੁਰ ਦੀ ਅਗਵਾਈ ਹੇਠ ਪੁਲਿਸ ਅਧਿਕਾਰੀਆਂ ਨੇ ਰੋਕਿਆ ਤਾਂ ਉੱਥੇ ਹੀ ਚੱਕਾ ਜਾਮ ਕਰ ਦਿੱਤਾ ਗਿਆ। ਕਈ ਗੇੜ ਦੀ ਹੋਈ ਗੱਲਬਾਤ ਉਪਰੰਤ ਜ਼ਿਲ੍ਹਾ ਵਿਕਾਸ ਅਤੇ ਪੰਚਾਇਤ ਅਫ਼ਸਰ ਨਾਲ ਕੀਤੀ ਗੱਲਬਾਤ ਅਨੁਸਾਰ ਮੌਕੇ ਉੱਤੇ ਹਾਜ਼ਰ ਜੇਈ ਪੰਚਾਇਤੀ ਰਾਜ ਅਸ਼ਵਨੀ ਗੇਰਾ ਤੇ ਹਰਜੀਤ ਸਿੰਘ ਵਲੋਂ ਲਿਖਤੀ ਰੂਪ ਉਕਤ ਮੰਗਾਂ ਨੂੰ ਮੰਨਣ ਦਾ ਭਰੋਸਾ ਦਿੱਤਾ ਤਾਂ ਜਾ ਕੇ 4 ਵਜੇ ਸ਼ਾਮ ਨੂੰ ਸ਼ੁਰੂ ਹੋਇਆ ਚੱਕਾ ਜਾਮ ਰਾਤੀਂ 7 ਵਜੇ ਖ਼ਤਮ ਕੀਤਾ ਗਿਆ। ਇਸ ਮੌਕੇ ਯੂਨੀਅਨ ਦੇ ਸੂਬਾ ਪ੍ਰੈੱਸ ਸਕੱਤਰ ਕਸ਼ਮੀਰ ਸਿੰਘ ਘੁੱਗਸ਼ੋਰ ਨੇ ਕਿਹਾ ਕਿ ਗ੍ਰਾਮ ਸਭਾ ਅਜਲਾਸ ਨੂੰ ਇਹਨਾਂ ਪਿੰਡਾਂ ਦੇ ਸਰਪੰਚ ਮਜ਼ਾਕ ਹੀ ਸਮਝ ਰਹੇ ਸਗੋਂ ਗ੍ਰਾਮ ਸਭਾ ਦੇ ਅਜਲਾਸ ਤੋਂ ਆਪਣੇ ਆਪ ਨੂੰ ਉੱਪਰ ਸਮਝ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਜਦਕਿ ਕਾਨੂੰਨ ਅਨੁਸਾਰ ਪੰਚਾਇਤ ਤੋਂ ਗ੍ਰਾਮ ਸਭਾ ਉੱਪਰਲਾ ਅਦਾਰਾ ਸਮਝਦੇ ਹਨ।

ਉਨ੍ਹਾਂ ਕਿਹਾ ਕਿ ਗ੍ਰਾਮ ਸਭਾ ਨੇ ਆਪਣੇ ਅਧਿਕਾਰ ਦੀ ਵਰਤੋਂ ਕਰਦਿਆਂ ਹਾਜ਼ਰ ਮੈਂਬਰਾਂ ਦੀ ਸਹਿਮਤੀ ਨਾਲ ਪਿੰਡ ਪਾੜਾ ਪਿੰਡ ਵਿਖੇ ਮੈਂਬਰ ਪੰਚਾਇਤ ਆਸ਼ਾ ਰਾਣੀ ਨੂੰ ਸਭਾ ਦੀ ਪ੍ਰਧਾਨ ਚੁਣ ਕੇ ਗ੍ਰਾਮ ਸਭਾ ਦੀ ਕਾਰਵਾਈ ਕਰਕੇ ਲੋੜਵੰਦ ਬੇਘਰੇ ਤੇ ਬੇਜ਼ਮੀਨੇ ਕਿਰਤੀਆਂ ਨੂੰ ਰਿਹਾਇਸ਼ੀ ਪਲਾਟ ਦੇਣ ਦਾ ਮਤਾ ਪਾਸ ਕਰਨ ਦੇ ਨਾਲ ਨਾਲ ਚੱਲਦੀ ਕਾਰਵਾਈ ਚੋਂ ਚਲੇ ਜਾਣ ਤੇ ਨਾਲ ਹੀ ਪੰਚਾਇਤੀ ਕਾਰਵਾਈ ਨਾਲ ਲਿਜਾਣ ਤੇ ਗ੍ਰਾਮ ਸਭਾ ਅਜਲਾਸ ਦੀ ਤੌਹੀਨ ਕਰਨ ਵਾਲੇ ਸਰਪੰਚ ਅਸ਼ੋਕ ਕੁਮਾਰ ਵਿਵਹਾਰ ਖਿਲਾਫ਼ ਨਿੰਦਾ ਮਤਾ ਪਾਸ ਕਰਦੇ ਹੋਏ ਕਾਰਵਾਈ ਦੀ ਮੰਗ ਦਾ ਮਤਾ ਪਾਸ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਇਸ ਤਰ੍ਹਾਂ ਹੀ ਪਿੰਡ ਕੁੱਦੋਵਾਲ ਵਿਖੇ ਗ੍ਰਾਮ ਸਭਾ ਅਜਲਾਸ ਵਿੱਚ ਹਾਜ਼ਰ ਮੈਂਬਰਾਂ ਨੇ ਐੱਸ ਸੀ ਪਰਿਵਾਰ ਨਾਲ ਸੰਬੰਧਿਤ 70 ਸਾਲਾਂ ਸਾਬਕਾ ਪੰਚ ਧਰਮ ਸਿੰਘ ਦੀ ਪ੍ਰਧਾਨਗੀ ਹੇਠ ਗ੍ਰਾਮ ਸਭਾ ਅਜਲਾਸ ਦੀ ਕਾਰਵਾਈ ਕਰਕੇ ਪਲਾਟ ਦੇਣ ਦਾ ਮਤਾ ਪਾਸ ਕੀਤਾ ਗਿਆ ਅਤੇ ਦਿਆਲਪੁਰ ਵਿਖੇ ਵੀ ਗ੍ਰਾਮ ਸਭਾ ਮੈਂਬਰਾਂ ਨੇ ਨਿਯਮਾਂ ਅਨੁਸਾਰ ਮਤਾ ਪਾਸ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਜੇਕਰ ਪੰਚਾਇਤ ਵਿਭਾਗ ਦੇ ਅਫਸਰਾਂ ਲਿਖਤੀ ਰੂਪ ਵਿੱਚ ਮੰਨੀਆਂ ਮੰਗਾਂ ਨੂੰ ਲਾਗੂ ਨਾ ਕੀਤਾ ਗਿਆ ਅਤੇ ਲੋੜਵੰਦ ਪਰਿਵਾਰਾਂ ਨੂੰ ਰਿਹਾਇਸ਼ੀ ਪਲਾਟ ਅਲਾਟ ਨਾ ਕੀਤੇ ਗਏ ਤਾਂ ਸੰਘਰਸ਼ ਨੂੰ ਤੇਜ਼ ਕੀਤਾ ਜਾਵੇਗਾ। ਇਸ ਮੌਕੇ ਯੂਨੀਅਨ ਆਗੂ ਗੁਰਪ੍ਰੀਤ ਸਿੰਘ ਚੀਦਾ, ਤਹਿਸੀਲ ਪ੍ਰਧਾਨ ਬਲਵਿੰਦਰ ਕੌਰ ਦਿਆਲਪੁਰ ਆਦਿ ਨੇ ਵੀ ਸੰਬੋਧਨ ਕੀਤਾ।